PUMA 重塑 97 港隊經典戰袍
李健和 × 丘建威 × 艾華頓：跨越三十載的紅色傳承
近年「Blokecore」復古球衣穿搭風潮席捲街頭，球衣早已超越運動裝備的界限，成為記錄城市記憶與本土文化的載體。PUMA近日宣布將會推出香港復古球衣，以1997年世界盃外圍賽香港隊擊敗泰國的經典球衣作藍本。品牌日前邀請港足名宿李健和、丘建威以及現役港腳艾華頓出席活動，分享對香港足球發展、球迷文化及年輕球員外流的看法。
▍一件球衣 一段屬於香港足球的回憶
穿上這件滿載回憶的戰袍，昔日港足右路殺手「和哥」李健和坦言記憶立刻湧現：「一見到呢件球衣，就自然會記起嗰場比賽。以前香港隊成日都會換唔同款式球衣，所以好多時見到件衫，就會聯想到嗰場波同當時嘅情景。」前香港足球先生「丘 Sir」丘建威則對當年 PUMA 的全套裝備記憶猶新，更笑談當年裝備的獨特之處：「我對嗰個年代嘅PUMA裝備印象好深。尤其係件風褸，好厚身，真係非常擋風。我記得同期有啲東歐球隊嘅裝備反而比較輕身，所以形成幾大對比。」
▍球迷文化二十年劇變 丘建威：不能只得港隊幾萬人，本地聯賽得幾百人
近年港隊及港超聯入場人數持續上升，由昔日香港大球場到如今啟德主場館，香港足球氣氛明顯升溫。談到近二十年球迷文化變化，丘建威認為最大分別來自社交媒體興起：「以前南華、流浪嗰啲年代，每個球迷組織都有自己地盤，但影響力主要都喺球場入面。而家有社交媒體、有唔同球迷群組，大家聯繫得更加緊密。」不過他同時強調，港隊熱潮並不足以支撐香港足球長遠發展：「香港足球要健康發展，唔可以淨係港隊有幾萬人睇，本地聯賽就得幾百人睇。球迷除咗支持港隊之外，都應該支持本地球會。因為冇球會，就冇職業球員；冇職業球員，就冇香港隊。」李健和則留意到球迷結構的轉變：「我覺得整體睇波嘅人真係多咗。以前好多時都要家長帶住先可以睇波，但而家好多十幾歲學生已經會自己入場支持球隊。」
▍懷念昔日外援百花齊放 寄語外流後輩：認清現實，最緊要有得踢
回顧球員時代，兩位名宿經歷過香港頂級聯賽外援雲集的輝煌期。李健和提及最深刻的外援是曾效力麗新的蘇格蘭前鋒史賓沙（John Spencer），認為對方年紀輕輕已展現頂級實力。曾同史賓沙並肩作戰的丘建威則認為，昔日港甲最令人懷念的是不少中下游球隊同樣擁有高水平外援，形成「百花齊放」的局面。「最深刻反而係當年香港足球好多中游甚至下游球隊，陣中都會有兩、三個能力非常突出，同埋好有個人特色嘅外援。唔單止爭標球隊先有好外援，成個聯賽好多隊都有非常出色嘅外援，可以話係百花齊放。」
至於近年愈來愈多香港球員選擇外流發展，兩位名宿一致認為，球員是否能夠穩定上陣，比聯賽名氣更重要。曾外流新加坡聯賽的李健和表示：「最重要係有得踢。去外地發展當然係好事，但如果去到完全冇機會落場，其實冇咩意思。年輕球員最重要係比賽時間。」丘建威則提醒年輕球員要腳踏實地。「踢波生涯其實得十幾年，如果浪費幾年喺後備席，好快就過去。如果有機會爭取正選，當然值得去搏；但如果根本冇得踢，就真係要考慮清楚。」不過他並非反對年輕球員追夢。「我哋經常鼓勵球員放眼世界，但同時間都要認清現實。歐洲足球同香港足球之間仍然有非常大嘅距離。有夢想係好事，但最重要係了解自己身處咩位置，再一步一步向前行。」
▍艾華頓同場交流感榮幸 珍惜啟德震撼氛圍
現役港腳艾華頓同樣有份出席活動，他直言球迷的支持是他前進的最大動力。由香港大球場到啟德主場館，艾華頓見證了香港足球近年的轉變。他認為球迷支持始終是球員最大的動力。「無論係香港大球場定係啟德主場館，我哋都可以感受到香港球迷嘅支持。不過啟德係全新球場，氣氛真係非常震撼。最近兩場比賽幾乎爆滿，呢啲時刻我會永遠記住。」艾華頓亦認為，港隊近年成績進步以及港超聯水平提升，是吸引更多球迷入場的重要原因。「我希望未來有更多球迷繼續支持香港足球。」
▍寄語東盟盃與亞運：力撐本地球員，青訓方為長遠之本
談到未來港隊發展，兩位名宿均強烈呼籲給予本地青年球員更多實戰機會。李健和坦言：「我希望盧比度（Chino）可以畀多啲本地球員機會。我一直都好支持本地球員發展。如果用八、九個歸化球員仍然冇理想成績，我寧願畀本地球員去踢。本地球員努力咗咁多年，應該得到機會。」丘建威則重申，青訓始終是香港足球長遠發展的根基。「提拔年輕球員永遠係最重要。有時與其搵一個冇長遠價值嘅球員坐後備，不如畀年輕球員感受下大賽氣氛。咁樣對香港足球未來更有幫助。」
由 1997 年世界盃外圍賽的激情歲月，到今日全新啟德主場館的紅色人海，PUMA 這件復刻戰袍縫合了跨越三十年的港足記憶。球衣上的紅色翻領與跑道圖案依舊鮮明，而那份不服輸、每一球拼盡全力的香港精神，亦將在不同世代的球員腳下繼續傳承。
▍PUMA 香港復古球衣（Hong Kong Heritage Jersey）發售詳情
公開發售日期：2026 年 9 月 11 日起
銷售點：hk.PUMA.com 官方網站、指定 PUMA 專門店及授權零售商
限定收藏版：特別限定燙布印字版將於 9 月 10 日率先推出（數量極為有限，須經抽籤購買）。
抽籤詳情：將於 9 月 7 日於 PUMA 香港官方 Instagram（@pumahk）正式公佈。