四大豪門夏天殺到香港
曼城國米有望以「準盟主」姿態決戰啟德
香港足球盛會今個夏天回歸，曼城、國際米蘭、車路士同祖雲達斯四大豪門會喺 7 月 31 日至 8 月 5 日喺啟德主場館上演兩場重量級對碰。發佈會仲請到胡禮菲臘斯、韋利、迪馬堤奧同戴維斯四位名宿撐場，氣氛相當熱鬧。
文化體育及旅遊局局長羅淑佩話，香港啱啱搞完七欖，依家再有四大豪門嚟，體育盛事一浪接一浪。佢提到國米今季喺意甲遙遙領先，而曼城同阿仙奴同分爭標，「英超冠軍對意甲冠軍嘅碰撞一定精彩」。佢仲笑言自己係曼聯球迷，但都要承認曼城今季勢頭勁，「嚟香港比賽一定更加吸睛」。
羅淑佩又話，4隊加埋有 35 個國籍嘅球員，陣容夠晒頂級，「意大利入唔到世界盃決賽周，反而更有機會派出強陣嚟香港」。佢亦提到啟德草地經過七欖三日比賽仍然保持良好狀態，而去年有 48% 觀眾係外地旅客，今年預計差唔多。
TEG Sport 執行董事 Rachael Carroll 表示，連續兩年請到四大豪門嚟香港，已經證明香港係國際體育盛事嘅重要城市。佢話世界盃年令球會更重視備戰，「四支世界級球隊同場已經好罕見」，並提醒球迷一定要經官方渠道買飛。
曼城名宿 Shaun Wright‑Phillips 亦向香港年輕球員送上建議：「努力、犧牲，仲要肯聽教練、父母、老師嘅意見。」佢話英超講求細節，「你能唔能夠將資訊放到球場上，就係能唔能夠喺最高水平立足嘅分別」。
門票將於 5 月中公開發售，票價由 $399 起。
