南華聯乘英國經典球衣店 首推復古球衣
18/07/2025
上月剛捧走足總盃初級組的香港老牌球會南華，今個夏天密密有搞作！南華近日與出售經典球衣的英國網店Cult Kits展開為期一年的合作計劃，首階段推出由本地設計師Rex Ko設計的南華復古球衣和一系列服飾。除了勾起「擁南躉」的集體回憶，更讓新一代球迷了解到這支「球場皇霸」的輝煌歷史！
「歐美傳佳話」 所言非虛
有份為兩個品牌鋪橋搭路的Lucas，提到當初與Cult Kits洽談，雙方第一時間想起的香港球會就是南華會。Lucas解釋，南華當時與港隊（港聯）幾乎包辦賀歲盃和外隊賽，這次復古球衣致敬的1997/98球季南華球衣，就曾在曼聯訪港時亮相。
Lucas指南華經典球衣即使遠在海外，也受球迷青睞：「你見到二手波衫市場，南華波衫一直好貴，好多人搵：作為vintage（復古）波衫，佢最重要嘅元素係Coca Cola嘅商標、充滿特色嘅色調，同埋佢歷史背景，有畢特、基士文呢啲名宿。」
首將「南華」兩字放於贊助商商標位置
兩件復古球衣，都有「南華」兩字垂直放於胸前，就連陳偉豪首次穿起時都大為驚訝：「着咁多年南華波衫，都未試過有咁大隻『南華』喺前面！」
設計師Rex特意提起外國人與港人對使用漢字的不同觀點：「香港人覺得漢字比較難用得靚，容易老土；反而Cult Kits話件衫一定要有好多漢字，先代表到香港。」
曾為「黐線佬」設計聯乘球衣 下步劍指港隊紀念衫
這次pop-up store在7月18日開幕，Rex正剛從韓國看畢東亞錦標賽回港不足3日。他形容球衣是球迷之間的重要連繫，即使素未謀面，在首爾看見大家穿上港隊球衣，也會揮手問好，「如果着時裝，就會話係撞衫！」
早前曾為球迷組織「波台黐線佬」和本地啤酒品牌設計聯乘球衣的Rex，亦希望未來能為港隊設計球衣：「呢個係我嘅夢想！我覺得如果搵到啲元素，就係時候。或者未必係港隊，可以係一件波衫紀念香港球迷嘅付出，希望有呢個機會！」
Cult Kits與南華的乘聯pop-up store將在7月23-27號移師至觀塘的HKGballboot舉行，有興趣嘅朋友記得趕上尾班車喇。