唐文專訪正文
文：Ant
正面形象的背後
自港超停擺起，已有近半年時間沒有近距離接觸過球員。也許是剛經歷完泰國之旅，或是訪問場地的昏暗燈光，「唐文」膚色黝黑了不少，不變的是那標誌性的髮型和溫文爾雅的談吐。球場內是位防守穩健而不惹火的球員，場外則是愛狗更愛子女的好爸爸。在職業生涯尾段發光發亮，堪稱大器晚成的唐建文，認為他的人生經歷塑造了自己的正面形象。
「可能自己太遲先開始（成名）啦，又可能大家見唔到我鬧仔！」15歲首次於當時的港甲首度亮相，但之後表現算不上特別亮眼。2012年夏天轉投太陽飛馬，後來成為球隊隊長，卻一直與冠軍無緣，更遇上班主撤資而散班。他稱，如果自己一出道就成名，甚至成為神射手，自己的處事方法可能也會變得不一樣，「亦可能係大家造成，大家睇波時鼓勵我，所有嘢係一齊造成！」
加盟傑志後，相信沒有多少人相信他能撼動時任隊長盧均宜的正選位置。這段時間，唐建文堅持做好本份，回報一直以來信任他的人，「可能有人會質疑我，『吓？嗰個人得唔得㗎？』但當我有成就嘅時候，嗰位球迷就真係會覺得好開心，可以話比人聽，佢支持嘅嗰一個球員係真係得嘅。」
在傑志的第一季，唐建文終於贏得自己職業生涯的冠軍；但只是一個聯賽盃，對於一支班霸來說算不上滿意的球季。2017年，他在球隊站穩陣腳，以正選身份出戰兩場亞冠盃外圍賽：先在香港大球場擊敗河內FC，再作客蔚山現代苦戰120分鐘，最終在互射十二碼階段僅負出局。
亞冠盃 六年的等待和傳承
傑志此後在亞洲賽的進步有目共睹：1:0絕殺柏雷素爾，感動大球場7,771名球迷；去年受惠於朝鮮退賽，再獲與日、泰勁旅交手的機會，惜僅以得失球差無緣出線。今年港超聯因疫情停擺，傑志提早個半月赴泰國準備亞冠盃。唐建文形容，這次的集訓營是前所未有：「平時季前集訓，你知道自己有時間準備全季，但今次一完咗（集訓），就係亞冠。所以所有嘢，包括訓練強度都唔一樣，要谷到球員狀態，同時平衡唔好受傷。」
除了訓練強度，唐建文也十分享受這次亞冠之旅的氣氛，「大家都係一條心，一個團隊可以用咁短時間，由老闆、幫我哋安排旅程嘅職員，所有人都想做好同一件事。呢件事我哋深深感受到，當每一個人都願意放低自己去成就一件事，係可以做到想像唔到嘅成功！」
傑志最終雙殺清萊聯，並於最後一場補時階段逼和神戶勝利船，成為首支晉級亞冠盃淘汰賽階段的香港球隊。惟與以往不同的是，近季開始控制上陣時間的唐建文，今屆比賽淡出主力陣容：「雖然知道自己冇得踢，但都畀盡自己100%力練波；比賽時成個後備席都好似助教咁鼓勵、提場，好投入比賽入面。」
「教練派我同黃洋出場，因為我哋一出嚟就準確做到佢想要嘅嘢。傑志有好多有經驗嘅球員，而我哋都好想將呢啲經驗傳畀新一代。」
退役仍難捨足球 望副業支撐生計
說到傳承，於7月初宣布掛靴的唐建文，希望以另一個崗位貢獻傑志、貢獻香港足球。唐建文30歲重返傑志，重遇當初提拔他成為全職球員的伯樂朱志光，使他更確信一位好教練的價值：「如果我細個嘅時候有個教練可以傳授一啲經驗畀我，我就可以早啲成長，早啲知道點樣應付比賽。」
追蹤傑志2018年亞冠盃而拍攝的紀錄片《乘浪行》，最近在YouTube公開上傳。片中公開不少球員備戰的心路歷程，其中唐建文提到，自己在30歲後一直著重調節自己的飲食和作息，也許這就是他33歲仍能首度獲港隊垂青，「摱車邊」成為大港腳的秘訣。「如果想成為一個好球員，我覺得係真係需要有好教練，佢除咗可以教你點樣踢波，好多時仲教你點樣可以成為一個職業球員、一個專業嘅人。」
「即係你準備退役嘅時候⋯⋯」談到退役後的生活，唐建文此時猶疑了一會才說下去，「如果又要養小朋友、又要供樓，又要有其他不同嘅支出，其實係真係好難。」
職業球員應否「賣慘」成為近年的討論。說實話，球員薪酬已比過去提升了不少，但近季仍然不時傳出散班、欠薪等負面新聞，加上港府屢次因疫情打斷港超聯，球會、球員收入難以稱得上穩定。他坦言，教練的收入一定不及做球員時，且難以維持現時的開支。「一係我就完全唔再接觸足球做其他嘢，但係我仍然想接觸足球。所以我先開始呢個副業。」
這個副業，是他於四月推出的自家髮泥品牌Thunder Feather。有追蹤港足球員和專頁的球迷，那幾天大概都會被這罐髮泥鋪天蓋地「洗版」，唐文動用不少「人情牌」，也送出不少產品讓身邊好友試用。（包括三位有份訪問的編輯！）
「因為我想教波，又有兩個小朋友，又要供樓，我真係搞唔掂。所以就有呢個品牌嘅誕生。」唐建文直言，Thunder Feather的誕生，源自於他對足球的熱愛堅持。
三百次失敗 釀製一次成功
從零開始研發一個品牌，唐建文要由朋友身上偷師學習網站設計、營銷等技巧，「就好似足球咁，一個人其實做唔到咁多嘢，我相信想一件事成功，係需要唔同人去幫手，唔係每一個人同自己一樣先會成功，而係要接納大家嘅優點同缺點。」
結果這三種髮泥產品，他最終經歷了超過300次失敗，才能研發成功。要說像「朱sir」一樣的軍師，就是他太太Hailey，還有背後一班出謀獻策的朋友：「真係花咗好多時間（研發）。有時可能真係差少少，但係我好攰、有啲想放棄嘅時候，太太就會叫我再試吓，只係差少少，可能下一次就會成功呢……但係呢個下次會成功最後就變咗300幾次。而一開始冇打算用運動員呢個方向（營銷），都係有朋友一齊商量，到底件事點樣可以做好啲，朋友就有呢個建議，所以最後就試下。」
研發成功後，他來不及興奮，下一秒又被理性壓下情緒：「其實可能係十萬步嘅第一步。而家仲有好多唔同挑戰要面對，要令到更多人識，更多人買，或者繼續去發展，除咗呢三件產品，仲會唔會有其他呢？」就正如他的足球之路，寫完一個篇章，又有下一個挑戰等待著。
勉勵信信的格言：要找到自己能「型」的舞台
唐建文提到現年8歲的長子信信，說他間中說想成為職業球員，但也會因爸爸的成績而感到壓力，「佢成日都話：『你咁叻，我可能做唔到㗎喎。』」這時唐建文會回應：「咁唔會一開始都好叻㗎，我一開始都好䕢，係一步一步努力去換返嚟。如果你唔鍾意踢波你鍾意其他嘢，你可以去做其他嘢。」
他相信，兒子總有自己獨當一面的地方，希望信信能找到自己「型」的一面。正如他的足球生涯，即使未能於最初擔任的前鋒位置突圍，也能成為一位一夫當關的出色右閘。
這個在五月尾完成的訪問，也許是他以球員身份的最後一次。而無論將來是教練，或是品牌創辦人，相信不懈嘗試的唐建文，也有能力闖出一片天。
唐文髮型篇：
文：土瓜灣貝碧托夫
講起唐文，除咗踢波，又點可以唔提佢「打風都吹唔甩」嘅髮型呢！今次我哋就搵咗唐文講吓關於佢嘅新產品嘅故事。
問：作為球圈公認嘅型仔，你對於呢個形象點睇？
唐：其實以前比賽嗰陣都唔會Gel頭，但我又好想精神啲去比賽。因為嗰陣踢太陽飛馬其實都當咗係自己最後一季，覺得自己踢波唔太成功，已經諗住離開球圈。咁我諗住所有嘢都有啲大轉變，無論喺球場上面或者練習上面，再加埋自己嘅形象方面都想有啲唔同，所以諗埋Gel頭會唔會再精神啲，自己催眠自己一定要喺球場上做啲嘢，咁由嗰陣時開始去到而家都有呢個習慣。
問：點解你會想出有關於髮型嘅產品呢？
唐：首先因為我試過好多種唔同頭髮定型嘅品牌同產品，但係市面上見到好多品牌都有用到化學成份。我自己就唔鐘意用化學嘢，所以我就去研究一隻用天然成份製造嘅頭髮定型產品。我自己覺得，市面上每一個人都唔一樣，每一個人嘅喜好都唔一樣，我相信我嘅產品雖然唔能夠滿足所有人，但係總有一啲人會喜歡我嘅產品。
問：可唔可以講下產品出世嘅血汗史？
唐：一開始我就研究天然品牌成份係用咗乜嘢材料，喺香港同外國都試過訂啲原材料整，最後都係整唔到，但我又唔甘心放棄，所以就喺網上揀咗個課程去讀，先知原來我做緊嘅都算係一種化妝品，所以我就用造化妝品嘅方法將呢啲材料合埋一齊，例如要配合時間同埋溫度。因為咁岩疫情，所以我就有比較多時間可以做呢一樣嘢喇，好彩無浪費到呢一段時間。香味方面，當時我買咗差唔多二十款種精油，然後試下溝自己中意嘅味出黎。原來溝精油都係一門學問，我嗰陣自己睇書同埋上網睇，點樣可以有唔同香味、份量，前、中、後調。然後就發現，人越長大其實都要逼住不停學嘢，無得停。就好似我做球員嘅時候都係不停學習，足球發展都有唔同知識，所以到我遲啲出嚟，可能都係要不停咁學。當你不停學習，你先容易搵到自己嘅價值，如果唔係就好容易俾人淘汰然而自己都唔知。所以可能去到死之前，可能都係要不停學嘢，少少都要試下，總要吸收一啲新知識，人嘅價值先會可以係度。
問：咁你係一個愛狗之人，你嘅品牌都好強調「零殘忍」，呢一個賣點其實有幾重要？
唐：我有兩隻狗，大嗰隻已經離開咗，所以我希望做啲嘢去紀念佢，呢一樣都係我對呢個產品嘅其中一項要求。我對狗狗係有一份特別嘅感情，我自己覺得呢兩隻狗都好影響我嘅成長，形成咗今日嘅我。因為養狗嘅責任好大，可能由細到大得自己嘅時候都只係會諗住同埋滿足自己，但要照顧其他嘢嘅時候，個人就會產生好大變化。
問：你嘅髮型係球場上其實都出哂名持久，你會推介運動員做運動時用邊一隻產品？
唐：咁我自己比賽時就會用T1嘅水性髮油，例如踢亞冠嘅時候，我就係用T1嘅；至於T2嘅比較硬身嘅髮油，我自己同仔仔試過，如果短頭髮、又想做啲有層次嘅髮型，做運動嘅時候啲頭髮其實都唔會鬆哂落黎；而T3嘅髮泥就相對似休閒類型，因為曾經我太太同我講，唔太鐘意我出街將個頭整到咁恆，但係男仔總係想整齊啲出街，唔想頭髮吹到亂哂，咁T3就可以用黎整理好頭髮，但係又唔會好覺得係做咗定型，呢個係幾好用，亦都可以做到層次，又可以做到整齊有光澤。
（編按：如果唔想咁實淨就要T3；T1同T2嘅分別主要在於T1係Pomade，比較適用於中長髮，T2會似髮泥嘅質地，啱短頭髮多啲。）
問：除咗髮型之外，你會唔會有其他關於外觀打扮嘅貼士想比大家？
唐：其實我好鐘意著白色T shirt，但係如果要著白色T shirt，就要做番啲運動，大練大隻少少就會好睇啲。如果夏天真係好直接㗎，要做多啲運動，練大隻啲，膚色要黑少少。其實我講呢啲全部都係外表，但係我自己覺得喇，如果你對自己有自信嘅時候，你行出嚟自然就會好有型，呢一個係我自己嘅經驗黎。我以前都唔係依家咁樣，可能我做嘅野覺得滿意，然後有自信，相對上就會覺得自己行出嚟有型。
